Showing posts with label LAGUN TALDEAK. Show all posts
Showing posts with label LAGUN TALDEAK. Show all posts

2017-06-19

KONTXAKO HAUR GALDUAK




KONTXAKO HAUR GALDUAK
Seve Calleja
(Erein, 2017)

     Sorosleen etxolan bilduta daude hondartzan galdu diren umeak. Gabarroiraino joan dira hamabi umeak, Kontxako badian ospatzen ari den Piraten Abordaia bertatik bertara ikusteko. Baina gabarroia askatu eta nabigatzen hasi da bere kasa; “eskifaiakoak” lo geratu dira eta kobazulo batean esnatu.
Neska-mutilak salbatu eta babestu dituena Soinu da, oso zarpail jantzita eta zeharo itxura bitxia duen gizon basatia. Biharamunean, Soinuk etxera bidali ditu lagunak, eta zaharrenei bisitan bueltatzeko eskatu die, beti ere gogoan ipuin bat eta aldean mokadutxoa dakartelarik. Eta sekretua gordetzeko.
Bueltatuko dira lau nagusienak: Malen, Ainhoa, Denis eta Urko. Eta Felix ere elkartuko zaie. Felixek eskolan bullying jasaten du ikaskideengandik. Santa Klara uharteko ezkutuko kobazuloan Soinurekin geratzeko asmoa du Felixek, eguneroko gogorrari ihes egitearren.
Soinuk istorio piloa daki eta gehiago jakitearen irrikitan dago. Zergatik?

     Kontakizunean dozenaka kondaira, istorio eta historia daude txertatuta. Batzuk oso ondo azalduta daude, besteak ozta-ozta aipatu egiten ditu idazleak uhartearen zaintzailearen ahotan, gure jakin-nahia eta istorio-gosea piztuz.

     Koadrillako neska-mutilak hamabi urte ingurukoak izanagatik ere, liburua ez da soilik adin horretako jendearentzat. Irakurri eta gozatu liburuan azaltzen diren eta gehienetan kresala usaina duten istorio hauekin. Izugarri gustatu zait (eta tokitan daude nire hamabi urteak!)

Rafa L.




Idazlea


2015-12-07

BEGIA BEGI TRUK - SKATERRAK 3







BEGIA BEGI TRUK (Skaterrak – 3)
Mikel Valverde
(Giltza, 2014)


            Egin ez duen grafiti batengatik, zigorra bete behar izango du Imanolek Arte Garaikide Museoan. Estefano Sabatinik, eraikuntza-negozioan aberastutako gizonak, eragin handia izango du artegunearen zuzendariarengan.
            Estefano tipo trakets eta egoskorra izanda ere, tratu batera ekarri dute beste sakaterrek: hauek enpresariak jasaten ari den xantaia (izpirituen erasoaren itxura duena) argitzen lagunduko diote eta Sabatinik mesedea itzuliko die –Imaren barkamena lortzea eskatuko diote.
            Lanean hasita, “medium”aren itxurak egiten ibiliko da Anyo eta Adrian beti bezain fin ibiliko da informazioa biltzen; eta, oraingo honetan, arriskutik gertu, gertuegi.

            Lehendik ere eagutzen dugu nolakoak diren skaterrak. Estefano pertsonaia inozo samarra begitanduko zaigu. Istorioa ez da oso sinesgarria, baina dibertigarria bada, bai. Agian, bukaeran, kontakizuna gehiegi bermatzen da pertsonaia baten –Sanperenaren– aitorpenetan, korapiloa erraxkiegi askatuz. Kontakizuna linelaki emanda dago, historia ulertaraziko diguten aldizkako flash-back batzuk pertsonaien esandakoetan.


            Oso liburu aproposa irukurtaldi luzetxoak zail egin zaizkizuenontzat hamar minutuan irents daitezkeen kapitulutan antolatuta baitago liburua. Entreteniagarria oso eta eskuratzeko erraza e-liburutegiari esker.

Rafa L.







2015-10-02

IRAKASLE DESAGERTUAREN KASUA



LAU LAGUN ETA ERDI – 1
IRAKASLE DESAGERTUAREN KASUA (1995)
Joachim Friederich
(Giltza, 2009)


            Eskola berean dabiltza gure lau lagunak: Estefani, Errefautxo –neskaren anaia–, Txarli eta Fede. Federi izugarri polita iriditzen zaio Sulte-Stratmann andrea, Natur Zientzietako irakaslea. Ia-ia maiteminduta dagoela esango dute bere lagunek. Irakaslea beti izan da egoskor samarra, zorrotza eta ikasleekin lagunkoikerietan ibiltzearen ez oso lagun.
            Bat-batean, Sulte-Stratmann andreak izugarrizko aldaketa egingo du: arropa garestia, auto deportiboa… Banku lapurreta egon da horietako egun batean. Kasualitatea ote? Legez kanpoko zerbaitetan nahastuta egongo al da Naturrekoa? Izan ere, guztiz ezohizko lekuetan eta jende arraroarekin ikusi izan dute lau lagunek eta Xarmantek –Fedek kalean topatu duen txakurtxoa, taldea osatzeko falta zen lagun erdia–.
            Federi izugarrizko bihotzondokoa emango lioke bere irakasle kuttuna poliziari salatu behar izateak. Baina oso-oso da susmagarria.

            Kontaketa arina eta erakargarria da. Pertsonaiak atsegin eta sinpatikoak egiten zaizkigu. Ausardia behar denean, ausartak izango dira. Eta beldurra pasatakoan, bere izua aitortuko dute lotsarik gabe. Gustu askoz izango ginateke gu horren koadrilla jatorrako kideak.

            Merezi du irakurtzeak. Aspaldian idatzitako abenturak badira ere (jendeak telefono-kabinak erabiltzen zituen deiak egiteko!), oraindik erakargarri egiten zaizkigu. Gustukoa izan baduzue serieko lehenengo hau, zortekoak zarete: Lau lagun eta erdik pilo bat abentura liburuak dauzkate, eta eskura dauzkagu gehienak "e-liburutegia"n.

            Eskolako gazteenentzako egokia, besteei infantilegia irudi dakizueke. 

Rafa L.






2015-08-01

TXINAKO KOADERNOAREN MISTERIOA















Voltaire kaleko abenturak – 6
TXINAKO KOADERNOAREN MISTERIOA
P. Baccalario
(Mezulari, 2013)


            Theophile Brocard liburu-saltzailea hil egin da. Bere emazteak salduko ditu dendako guztiak. Barduchon gazteak erosi ditu hango liburuak eta Annettek topatuko du koaderno berezia –liburu-saltzailearen egunerokoa dena– material haren guztiaren artean.

            Barduchon andreak azokan bilduko duen informazioarekin, Valentinek Leopold Bocardekin –hildakoaren anaiarekin– izandako elkarrizketan lortutakoarekin eta beste hainbatekin Theophile Brocardek nobleziaren partaidea izateko grinaren berri izango dute Voltaire kaleko ikerlariek. Kasua argitu eta poliziaren esku utziko dituzte gaizkileak

            Volataire kalekoen abentura guztietan azaldutako gako eta pasarteak izango ditu honek ere: Valentine kazetariaren laguntza “profesionala”, Victorren gaizkileen saltsen ezaguera ezinbestekoa, Barduchon andrearen informazio zorrotzak eta bileretako egindako gozoki apartak, eta Barduchon gaztearen “bi zaldikoan” egindako jazarpen eroak.


            Betiko osagaiekin abentura berri eta erakargarria osatu du oraingoan ere egileak, irakurketa arina, atsegina eta harrapatuko zaituena. Gustura irakurriko duzu.

Rafa L.


2015-07-08

KALIFORNIAKO NESKAK


KALIFORNIAKO NESKAK
Josemari Iturralde
(Ibaizabal, 2000)


            Anuxka, Ainhoa eta Risky Amerikara doaz oraingoan. Udan ingelesa ikasteko asmoz joango dira Kaliforniara eta hango bizimoduaren eta gazte jendearen bitxikeriak ezagutzeko parada izango dute. Une alaiak, festa girokoak, biziko ditu Anuxkak: latz eta larriago beste batzuk ere. Arraro egingo zaizkio gizarte aberats hartako giroa eta neska eta mutilen arteko harreman ohiturak. Azkenean onik bueltatuko dira denak etxera.

            Istorio bat beharrean, badirudi kapituluen bilduma dela liburua. Ez dago liburuan zehar kontakizuna gidatuko duen haririk eta osotasuna falta nabaria da. Pasadizoak nahikoa sinesgaitz –edo, gutxienez, arrotzak- egiten zaizkigu eta sorpresa handirik gabeko kapituluak metatuz osatzen da liburua.


            Risky eta lagunen liburuak irakurri izan duzuenok badakizue nolakoak diren. Honelako beste bat da hau. Ezin esan irrikitan irakurtzen den horietakoa denik!

Rafa L.  








2015-06-10

ARRISKUPEAN

 ARRISKUPEAN
Fernando Morillo
(Ibaizabal, 2003)


            Gure inguruan dagoen edonork, pertsonaia arruntena izanda ere, gorde lezake sekreturik handiena. Ustekabean egingo du Isuskok tupust honelako kasu batekin. Institutuko pertsonarik atsegin eta amultsuenak ezkutuan gordetzen zuen iragan iluna arakatzen arituko da Isusko, Ibairen laguntzaz. Hau dela eta, abentura arriskutsuan ibiliko dira murgilduta kuadrillako gazteak.

            Aurreko kapituluetan martxa handiz hasi eta interesgarria oso egiten zaigun istorioa moteltzen joango da aurrera egin ahala eta bukaerako sinesgaitza eta nahikoa topikoa bihurtuko da. Zergatik? Agian; idazleak ez ditu pertsonaiak behar bezala lanean jartzen bere ekintza, gorabehera eta bizipenen bitartez misterioa argitu dezaten, eta ordenagailu “orojakilearen” truko errazean erortzen da behar baino gehiagotan.
            Bestela esanda, badirudi oraingo honetan idazleak oso ondo ezagutzen ez dituen nazioarteko espioitza eremutan ibili dela eta, noski, galdu samar dabilela; bestetan maisuki erabili izan duen (Izar Malkoak) sinesgarritasunetik  urrun.

            Hala ere, entretenigarria, erraza eta di-da batean irakurtzen den liburua da eta egilearen punta-puntenekoa ez bada ere, merezi du.

Rafa L.







2015-04-28

SKATERRAK-2 IRAGANIK GABEKO GIZONA





SKATERRAK – 2
IRAGANIK GABEKO GIZONA
Mikel Valverde

(Giltza, 2013)


              Andrianek tupust egin du plazan tipo bitxi batekin. Honek kontuz ibiltzeko aholkatu eta oroitzapenak berreskuratzeko laguntza eskatu dio gazteari. Hainbat lagun skaterrek jasandako memoria-galera uneen berri izango du Adrianek, eta gazte hauen lokietan gizon bitxiari ikusitako marka berbera antzeman die.
                Txakurraren txipeko informaziotik abiatuta, skaterrek datuak bilduko dituzte eta gizon bitxia Jakobo Martinez ikerlaria dela jakingo dute, giza-garunaren funtzionamenduaren aditua, behinola Neurociling enpresarentzat lan egindakoa. Inbertsore berrien eskuetan dago orain enpresa hori eta kaleko gazteak —skaterrak— erabiltzen omen dituzte esperimetaziorako kuiatxoen gisa. Hori da, behintzat, gure lagunek argitu nahi izango duten susmoa.

                Kapitulu motzak. Hizkuntza argia eta zailtasunik gabekoa. Istorio —oso sinesgarria ez bada ere— kitzikagarria eta erritmo bizikoa. Serieko aurreneko liburua (Ertzean) irakurri bazenuen, ezagunak egingo zaizkizu pertsonaiak. Oso neska-mutil normalak, gu bezalakoak. Aurreko liburuan istorioa Gasteizen burutzen zela ematen zuen, honetan ezin antzeman.

                Serietako liburuekin beti aholku bera: utzi irakurketen arteko tartea. Beraz Skaterrak1-Ertzean aspalditxoan irakurri bazenuen, ekin honi. Ez zaizu damutuko. Gainera orain oso erraz eskura dezakezu e-liburutegiari esker.

Rafa L.


2015-04-17



Voltaire kaleko abenturak – 3
ERRETRATU FLANDESTARRAREN KASU BITXIA
P. Baccalario

(Mezulari, 2012)



            Barduchon antikuariaren lagun baten arte-galerian, obra garestiagoak eramateko aukera izanda ere, kopia kaskartxo bat lapurtu dute soilik. Hasieran lapurreta ezdeusa ematen duena garrantzi handiagoa hartzen joango da ikerlari-taldeak bere lanarekin aurrera egin ahala. Zergatik eta zertarako ebatsi balio eskaseko hura?
            Aretoan azaldutako oihal zerrendatxo batek eramango ditu Voltaire kaleko taldekideak lapurrarenganaino. Baina beranduegi, hilik topatuko baitute!

            Bat-batean, Fabok –Annetteren laguntzaz– bere neskalagunari, Malikari, urtebetzean erosi beharreko oparia dela, Lalouk interneten egindako aurkikuntza bitxiak direla edo Valentinek aldizkarirako egin behar duen erreportaia dela; horiek guztiek eramango dute ikerketa Ekialdeko Haizea  lurrin berriraino. Lurringileak susmopean geratuko dira azkar asko. Izan ere, Voltaire kaleko ikertzaile finek lapurreta eta hilketaren arteko zerikusia argituko dute bere jarduera burutsuarekin.

            Oso istorio entretenigarria, aurrekoak bezala, ezin utzizko irakurketaz gozaraziko dizuna. Zeren zain zaude liburutegira joateko?

Rafa L.

2014-04-05

SKATERRAK - ERTZEAN





SKATERRAK – ERTZEAN
Mikel Valverde
(Giltza, 2013)


     Eba oso arduratuta dago Adrian seme gazteenak egun osoa etxe-zokoan irakurtzen ematen duelako. Bestetik, Imanolek, zaharrenak, ez dio Adriani kasu zipitzik egiten eta beti dago parkean bere lagun skaterrekin jauzi berriak entsaiatzen bowlean. Anaia biak elkarrekin ateratzera behartuko ditu amak. Koadrillaren skate pista berriak topatu nahiak katedrale ingurura eramango ditu eta han Adrianen jakin-minak topo egingo dugu argitu beharreko ezkutuko batekin: elizako bitxi batzuen desagerketa. Gazteek ikerketari ekingo diote gogotsu.

       Gasteizen oso antzeko hirian kokatu da istorioa. Oso kontaera klasikoa egiten da: hirugarren pertsonan eta denbora jauzirik gabe. Ezagunak egingo zaizkigun pertsonaiak, nahiz eta  azaletik ikusiko ditugun. Istorioaren korapiloa ahultxoa da, agian eta ez sinistekoa hainbat pasartetan. Ebaren familia “normal” bat izateko obsesioa izango da hasi eta buka.
       Irakurterraza da eta hiztegi arazorik ez duzu izango. Kapitulu motzak dira irukurketaldi laburtxoei oso ondo egokitzen zazikio.

       Ebak uste izan du Adrian gaixotasunak jota dagoela hainbeste irakurtzeagatik. Horretan oker dago skaterren ama. Liburua jauzi sinistezinak eginaraziko dizkizun skaterra da. Egizu lehenengo honekin. Gustura irakurriko duzu.

Rafa L. 


e-liburutegian eskuragarri





2013-11-24

IRTEERA MARRAN - BOST IZARRAK-1


 
 
BOST IZARRAK – 1 / IRTEERA MARRAN
Andreas Schlüter & Irene Margil
(ibaizabal, 2012)
                James Connoly institutuan ikasten dute Bost Izarrek. Prestatzen ari diren Olinpiada txikietan Grünheim ikastetetxekoak izango dituzte lehiakide gogorrenak. Lehiakide izatetik aurkari eta etsai izatera pasatzeko punturaino ia-ia. Konpetizioa hasi denean, sabotaiak hasiko dira jasaten Michaelek-eta. Bati edari isotonikoa pozoitu, besteari pista zikindu edo materiala hondatu. Badirudi Grünheimeko Tom dabilela gaiztakeria horien guztien atzetik eta horrelakorik ez diote onartuko inola ere.
                Lennart, Ilka, Linh Yabali eta Michael dira protagonista: neska-mutil zintzo eta onberak, pre-nerabe zintzoegiak, egia esan behar bada, sinesgarriak izateko. Istorioa txintxo eta gaiztoen kontakizuna da, ezer berezirik gabe eta sorpresa txiki batekin bukaeran.
                Nahikoa mokoraino geunden kirolarekin egunkari-irrati-telebistetan eta orain ere trumilka sartzen ari zaizkigu eskoletako irakurketan ere. Futbolariak, atleta lehiakorrak eta mota guztietako gaztetxo konpetitibo bihurtu nahi dituzte gure liburuetako heroi berriak. Ez gaude konforme, hori ez da bidea, ez zaigu oso gizalegezkoa iruditzen. Hala ere, gustura eta erraz irakurtzen den liburua dela aitortu behar. Serieko lehenengoa ekarri dugu gure blogera eta nahikoa. Hurrengoak zuen kontu.
 
Rafa L.
 

2013-10-31

EZ ZUTEN ERANTZUN

 
EZ ZUTEN EZER ERANTZUN
Oier Santos
(Erein, 2012)

 

                Koadrilako gehienak unibertsitatean hasi dira ikasturte honetan. Neska-mutilak maila ertainekoak dira (eskuinaldeko bailarakoak) eta bistan da kontsumorako joera itzelaren menpe bizi direla. Parrandarako ametsetan daude uneoro: alkohola eta sexua. Baina “paradisu” honetan bizi izandako zoriona hutsal eta iraungaitza zapuztera etorriko da hondartzan antolatu duten festa beroan gertatuko den zerbait. Danelek eta Elak osatutako bikotea izango da istorioaren gunea Jaitz tartean paratzen den artean.

                Istorioaren hariak daukan trataera da atentzioa gehien ematen duena. Historia hasieratik kontatzen dizkiguten kapituluak, “zera” hura gertatu ondorengoa kontatzen dizkigutenekin tartekatzen baitira. Baliteke antolaketa honek jakinmina apur bat areagotzea, baina dexente zailtzen du irakurketa patxadatsua. Pasarte batzuk sinesgaitzak dira erabat, Nikolek pistola nola lortzen duen esaterako. Pertsonaiak niri ez zaizkit oso sinesgarriak egin, baina azken boladan urrun samar nabil “parrandromoetatik” eta ez naiz oso ondo enteratzen. Kontatuko didazue irakurritakoan.

                Izan ere, ez dakit zergatik, baina irakasleari gehiegi atsegin ez zaizkion eta ikasleak zoratzen dituzten kontakizun horietako baten aurrean ote gauden zalantza daukat… eta zuetako askok irakurtzea aukeratuko duzuela susma nezake.

Rafa L.
 
 
 



2013-10-13

AMAIA LAPITZ ETA DIDOREN ERMANDADE SEKRETUA

 
 
AMAIA LAPITZ ETA DIDOREN ERMANDADE SEKRETUA
Katixa Agirre
(Elkar, 2013)
                 Amona Angelinesek txatean lagun berria egin duela eta hura bisitatzera Afrika Iparraldera, Tunisiara, egingo duen bidaian lagunduko diote amonari Amaia Lapitzek eta Susanak, amak.  Hara iritsitakoan,  Ahmet, amonaren ustezko laguna den bezala azalduko zaie: negozio gizon zikina eta arriskutsua. Eraiki nahi duen jolas-parkeko orubean antzinako Kartagoko aztarna arkeologikoa – idatzitako oholatxo bat- azaldu da eta UNESCOk lanak geldiaraziko dizkio. Ahmetek Amaia bahituko du, eraikitze debekua kentzearen aldeko iritzia eman dezan Susana Lapitzek, arkeologo ospetsuak.
                Leilak eta Tarekek, Ahmeten bilobek, Amaia lagunduko dute ihes egiten eta hiru gaztetxoak elkarrekin altxor baten sekretua ezkuta lezakeen oholatxoa topatu eta Amaiaren ama askatzen ahaleginduko dira.
                Herriak askatasunaren alde lurralde arabieretan egindako ahalegina  azaltzen da kontakizunean eta herri txiroaren erdian leporaino aberasteko batere lotsarik ez duen jendilajea salatzen .
                Amaia Lapitzek Mexikon bizi izandakoak gustuko izan bazenituen, hau ere atsegin izango zaizu. Irakurri eta gozatu.
Rafa L.


2013-07-05

FENIXAREN ITZULERA (CODE LYOKO - 3)

 
FENIXAREN ITZULERA (CODE LYOKO – 3)
Davide Morosinotto
(Mezulari, 2011)
 
            Bere garaian Waldo Schaefferrek antolatutako inguru birtualeko diseinuan sandbox batzuk eratu zituen Lyokon: Mirror, Lehenengo Hiria. XANAk eta Green Phoenixekoek interes handia dute Lehenengo Hiriko gaztelua ganatzeko, hura arma gisa erabilita lor litekeen boterea mugagabea litzatekeelako.
            Gure gazte koadrillakoek, bestalde, Aelitaren gurasoak topatzeko ahaleginetan jarraitzen dute eta Mirroren Hopperren eguneroko birtuala ikusi eta aurreko historiaren hainbat pasarte ilun argituko zaizkie. Saio hauetan gazteetako batzuk geratuko dira mundu birtualetik atzera atera ezinik. Gainera, fabrika zaharreko ordenagailua Hannibal Magoren eskutan, Hermitageko scannerra geratuko zaie bakarrik gazteei mundu birtualerako ate.
            XANAk eta Magok ituna eginda eta ia tresneria guztiaren jabe; bide bakarra geratzen zaie Jeremy eta lagunei: Waldoren lankide ohiak –kasualitatez, gaztetxoen gurasoak- bildu eta galdutako oroitzapenak berreskuratu arazi ondoren, scanenerra atondu, isolatutako lagunak etxeratu eta arerio boteretsuak garaitzeko ahaleginetan dihardu.
 
            Seriearen aurreko liburuen freaky bidetik jarraitzen du istorioak. Narrazioa korapilo batera iritstakoan beti dago cyberbide bat aurrera egiteko eta, egia esan, irudimen handiko soluzioak izaten dira. Horregatik liburuak ez zuen merezi eman zaion bukaera: oso borroka standard eta txaf eta txof motako eszena ez oso imaginatiboarekin.
 
            Jeremy Belpoisen aurreko bi liburuak gustatu bazaizkizu, gustura irakurriko duzu hau ere. Hori bai, hobe saga hurrenkeran, hasieratik hasita, irakurtzea. Oraingo honek aurrekoen erreferentzia asko dauzka eta zaila izango zaizu hau bada Code Lyokoren zure lehenengo liburua.
 
Rafa L.

2013-05-20

FRANTZIAN JE T'AIME ESATEN DUTE
































FRANTZIAN JE T’AIME ESATEN DUTE
Joxemari Iturralde
(Pamiela, 2011)

 

                Eskolak bidaia antolatuta, egun batzuk pasako dituzte Risky eta ikaskideek Frantziako familiekin. Cornechon familak hartuko du Risky eta etxeko guztiekin, bereziki Bernard semearekin, bere erdipurdiko frantsesak uzten dizkion harremanak izaten saiatuko da gaztea. Mutilak bizi izango dituen mikroabenturak, hain dira sotil eta sinpleak non nekez esan baitaiteke apartekorik kontatzen denik. Egia esan, bakarrik Frantziako nesken lagunak egiteko moduak harrituko du Risky. Igerilekuko arratsalde-pasa arrunta, arrantzako saioa edo etxeko txakurra galdu zenekoaren moduko pasadizoak izango dira istorioaren ardatz: abentura handirik ez, baina gozamen lasai eta patxadatsua. 

                Erraz eta aidean irakurtzen den liburua da. Kapitulu laburrak. Istorio naif samarrak, baina erakargarri oso egiten direnak. Animatu, irakurri eta gustatuko zaizu; ez dudarik izan!
 
Rafa L.




2013-05-05

RABAN HEROIA- FUTBOLARI BASATIAK

 
 
RABAN HEROIA – FUTBOLARI BASATIAK
Joachim Masannek
(2003, Mezulari-2011)
 
Zer da hau? Blog honetan ere ez al gara libratuko futbolaren zaparradatik? Benetan sentitzen dut, baina Raban hau hain egin da famatua non jakin-minak aurre hartu egin die kirol erregea pikutara bidaltzeko aspaldiko zinei eta irakurri egin dut.
 
Zazpi eta hamahiru urte arteko neska-mutilek osatutako auzoko futbol taldea dira Futbolari Basatiak. Raban heroia taldeko jokalari kaxkarrena da. Nahitaez jantzi behar dituen edalontzi ipurdiko betaurrekoek ez dirudite oso aproposak ustezko kirolari iaioaren piura zaintzeko, baina saiatu egiten da eta Futbolari Basatietako taldekideek jasan egiten dute… hankasartzea handiegia izango den arte: Rabanek txuponeatutako jokaldi batean kale egin eta partida erabakiorra galduko dute. Orduan lurjota ibiliko da mutila, denek txokoan utzita. Willi entrenatzaileak gaztetxoa adoretzen saiatuko da eta erakutsiko dio nola argitu bere etorkizunari buruzko zalantzak antzinako jokalari handien izpirituen laguntzaz.
 
Raban oso mutil atsegina egiten zaigu, baina seguraski ez genuke inola ere gure gelako ekipoan hartuko. Zergatik onartzen dute Basatiek? Asko iraungo al du taldean?
 
Liburu hau serie bateko alea da; aurreko liburuetan bizi izandakoen aipuak etengabekoak dira eta agian ez da Raban ezagutzen hasteko egokiena. Irakurketa arina eta erraza da. Agian aproposagoa apur bat gaztetxoago direnentzat.
 
Rafa L.

2013-04-03

IZENIK GABEKO HIRIA - CODE LYOKO 2


CODE LYOKO 2 – IZENIK GABEKO HIRIA
Pierdomenico Baccalario
(Mensajero, 2010)

 

            Aurreko liburuan (Lurpeko gaztelua) Aelita superordenagailutik ateratzea lortu zuten Jeremyk-eta. Korrika eta presaka konputagailua itzali behar izan zuten XANA gaiztoak irtengo ez bazen; baina Hopper profesorea eta Anthea –Aelitaren ama- bideojokoaren barruan geratu ziren eta bertan daude oraindik. Haiek askatu ahal izateko informazioa biltzen hasiko dira gazte ausartak. Bilaketa honetan profesoreak utzitako bere lanaren arrastoa diren erreplika ordenadoreak topatuko dituzte Kadic-etik urrun, zein ondoko etxean, Yumik, Ulrichek, Jeremyk eta Aelitak berak.

            Sorpresak izango dira kontakizunean: Aelitak duela hamar urteko kontuak argituko dizkion aspaldiko lagun batekin egingo du bat, Odd lelotuta geratuko da Evarekin, Kadic-era iritsitako neska berriarekin, eta XANA gaiztoa ez da geldirik egongo eta bere asmo makurrak lortzetik hurren dabilela emango du.

            Irakurketa arina eta atsegina, erritmo bizikoa, ezin utzizkoa. Pasadizo handirik gabe joan da liburu hau, baina ondo mantendu du istorioaren tentsioa eta grinatsu gaude hirugarren zatia, honen jarraipena, esku artean noiz hartuko. Istorio zirraragarri, baina xalo eta konplikazio handirik gabekoen zalea bazara, zuretzat dira Jeremy Belpoisen abenturak.
 
Rafa L. 




2013-01-08

EGIAREN JOKOA


EGIAREN JOKOA
Annika Thor
(Elkar)





Liburu honetan koadriletan gertatzen diren haserre, gorroto, jelosiak eta inbidien berri ematen zaigu. Gogorra da lagun bat galtzea eta bada hura berreskuratzeagatik edozer egingo lukeenik ere. Horrelakoa da nobelako protagonista.
Ligeak, festak, eskolako “mobidak”... denetarik dauka liburuak.

Orain artean irakurri izan duten ikasle guztiak oso gustura geratu izan dira. Animatu... eta kontatuko diguzu.

Rafa L.


Hona liburuaren atzeko azalean duzun iruzkintxoa:

Lagunik handienak izan dira betidanik Nora eta Sabina. Ikasturte hau iritsi arte. Orain Fannyrekin dabil beti Sabina, eta Norak hauen kaodrilan sartzeko ahaleginak egin arren, bizkarra emango diote geihenetan. Aldi berean, beregan hurbiltzen da Karin, denek baztertzen duten neska potoloa, baina Norak ez du honen laguna izateko batere asmorik.Adiskidetasunari buruzko eleberri hunkigarri bezain zorrotza da Egiaren jokoa, guk denok ezagutu ditugun sentimendu eta esperientziak ezin argiago agerrarazten dituena: nola giza harremanetan batzuetan biktima eta besteetan borrero bihurtzen garen, nola lagun bat lortzeko beste bat traizionatzeko gauza izan gaitezkeen…

Elkarreko webgunean ez duzu informazio gehiago topatuko.



2012-11-18

MONSTER HIGH


MONSTER HIGH
Lisi Harrison
(Mezulari, 2010)



Hamabost urteko bi neska berri Salem herriko Merston Institutuan. Bata Melody Carver
bere familiarekin Oregonera etorri berria. Bera jakin gabe munstro mutil batekin gustatuta geratuko da.
Bestea Frankie Stein, oso polita, izan munstroa bada ere. Harro dago oso bere itxuraz, baina DARa denez sekulako presioa jasaten du bere izaera ezkutatu dezan; bere jostura, torloju eta azala gordean mantendu ditzan. Baina neska den bezalakoa azaldu nahi du; eta ez du mutil eder normiekin ligoteoan ibiltzeari uko egin nahi.
Egoera nahasi samarra da, ez oso alaia. Azkenerako gauzak okertu egingo dira… edo ez?



Fantasiazko istorioak gozatzen ditugunean ez zaigu gehiegi axola pertsonaien sinesgarritasuna eta
moldeak. Hala ere nobelan gazteek azaltzen dituzten hutsalkeriak nabarmena, kontsumorako
demasako grinak, bizitzako ardura bakarra arroparekikoa izateak, marketako morrontza ia erabatekoak atentzioa ematen digute eta gehiegizko iruditzen azkenerako. Horrelakoak al dira gazte amerikarrak?
Institutuetako kontakizunek dauzkaten ezaugarri eta ohiko pasarteak azaltzen dira: ligeak,
koadrillaren barneko liskarrak, neska hiperguapoen hantustea…

Hain modan dauden munstro, banpiro eta pertsonaia arraroen munduak; noiz eta… diferentea izatea, taldetik aparte ibiltzea, ideia propioak edukitzea hain gaizki ikusita dagoenean.
Kasualitate ote?


Modako liburua. Entretenigarria? Agian. Irakurri eta esango didazue.


Rafa L.





Egileak berak egiten duen promozioaren bideoa:


2012-10-01

URTEGIJAUNA



URTEGIJAUNA
Aingeru Epaltza
(Pamiela, 2002)


Irakurri al zenuten “Baloika”? Gogoratzen al zarete ikastolako futbolari hoberena zen Mikeltxorekin? Bada, oraingoan ikastolako neke-penak igarota udako oporretan urtegiaren ondoko udalekura joango da atseden egunak bertan emateko asmoz.
Urtegiaren inguruan Mamu eta Basajaun bitxiei buruzko kontuak ibiliko dira airean. Mikeltxo eta lagunak, ikertu eta okerrak zuzentzen ahaleginduko dira. Nafarroakoa ote urtegia? Itoizkoa ote? Agertzen diren jauntxo agintariak ezagunak zaizkigu? Irakurri eta erabaki...
Ai, ahaztu baino lehen... gozatu Aingeruren euskara ederraz.


Rafa L.