HAYDN-EN LOROA

HAYDN-EN LOROA

Felipe Juaristi

(Aizkorri, 2003)

            Inork espero ez zuena gertatu da Zarautzeko hondartzan: barku bat iritsi eta bertako hareetan geratu da trabatuta. Barkuak kolorez eta istorioz beteko du kostaldeko herri horretako bizitza egun batzuetan. Ontziaren aitzakian alkatea, musika irakaslea, dendaria eta beste hainbat herritar ezagutuko dugu eta beraiek izango dira istorio xinple, naif, kuttun eta erakargarri honen protagonistak.

            Irudi freskoak eta kolorea dira nagusi eta hauei lotutako sentsazioak sortaraztea izango zen seguru aski idazlearen asmoa. Liburu estetizista honetan kontatutakoak ez du pisu handirik.

            Hau dela eta, gaztetxoentzat erakargarri izango ote denaren zalantzak. Agian gaztetxoentzako eginda izan, baina bereziki helduei gustatu ohi zaien liburuen zerrendan sartu beharko dugu hau ere, Printze txikia, Krokodiloa edo egile beraren Animalien ihauteriarekin batera? Batek daki!

            Oso liburu irakurterraza da bestalde, musikari buruzko pasarte eruditoegi batzuk dira zailtasun bakarra. Gustura irakur daitekeen liburua iruditzen zaigu, baina lehen aipatutakoen antzeko liburuekin izandako esperientzia kontuan edukita, ez gara ausartzen irakurtzen bultzatzera. Beno, erabakia zuen eskuetan dago! Probatu eta gero esan!

Rafa L.

ZENBAT LUR BEHAR DU GIZON BATEK?

ZENBAT LUR BEHAR DU GIZON BATEK?
Lev Tolstoi
(Denonartean, 2011)

Pahom gizon lagilea eta maratza da. Geroan zer gerta ere, lur zati eder baten jabe izan nahi du. Izan ere, lur dexente izanda ez zukeen inoren beldurrik izango, ezta deabruarena berarena ere. Aholku emango diote mujik batek, merkatari batek eta haien esanei segika baxkiriarren naziora iritsiko da, han lurrak lortzea oso erraz egin daitekeen zerbait da. Han eremuak ez dira desiatinaka saltzen ohi bezala, eguneka baizik. Mila errublo pagatu ondoren, eguzkia zeruan egon bitartean korritutako lurrak bereak izango dira baldin eta irteera puntura iristen den ilunabarra baino lehen.

Gehiago nahiari buruzko parabola hunkigarria ematen zaigu Tolstoi maisuaren ipuin zoragarri honetan. Zertarako hainbat ondasun, hainbeste lurra nahi izan, gizon baten hilobia egiteko hiru arshin basta-sobrakoak badira?

 

Ordubete ederra pasatzeko aukera. Guztiz gomendagarria.

Rafa L.