2014-02-11

MAITE-MAITE ILE-APAINDEGIA

Maite-maite ile-apaindegia
Marie-Audie Murail
(Elkar, 2012)
 
                Louis Feyrieres ez dabil oso txukun eskolan. Mutilaren aitak, zirujau ospetsuak, etengabean jartzen dio eredu gisa Ludovike, ospitaleko lankide baten semea eta Louisen ikaskidea. Apur bat mokoraino dago Louis Ludovike Jasonekin.
                Eskolako praktikak egiteko ordua iritsita, amona joaten den ile-apaindegian egingo diote txoko bat Louis gazteari. Han giro atsegin eta lasaia topatu eta ofizioarekin –eta bertako jendearekin- zaletzen hasiko da mutila eta eskola betiko utzi nahirik ile-apainketa hartu nahi izango du bizibide. Mutil bizkorra da, iaioa eta gauzak aidean ikasten dituena.
                Maite-maite ile-apaindegian ia semetzat hartuko duen Madame Maiterekin egingo du topo. Eta etengabe bera xaxatzen diharduen Priscille, langintzako sekretuak erakutsiko dizkion Lucky eta jipoitzen duen bikotea jasan behar duen Clara  erakargarria ezagutuko ditu.
                Bricek, aitak, betidanik gutxietsi izan du eskulana eta gogor joko du semeak egindako aukeraren kontra. Mutilak, estreinakoz bizitzan, aitarekin talka egingo du eta bien arteko enfrentamenduak goia joko du.
 
                Pasarte solte eta laburrez osatutako kontakizuna. Pertsonaia asko pasatzen da istorioan zehar eta horrek mugimendu eta bizitasuna ematen dio; baina ez digu astirik emango pertsonaien bizipenak sakonetik ezagutzeko. Gai asko (eskola-porrota, bakardadea, aukeratu beharraren estresa, amodioa, emakumeen aurkako bortizkeria…) ukitu izan dira, oso gainetik ukitu. Giro burgestxoko protagonista batzuk (eskola pribatu garestiak, tenis kluba…) eta jende xeheagoa egingo dute bat istorioan, baina aparteko kontrasterik gabe.
 
                Bukaerako istorioa pastelegi bilakatu, tentsio-puntua galdu eta sakabanatu egiten da. Hala ere gustura irakurri egiten den liburua da. Denbora-pasa balekoa.
 
Rafa L.
 

 

2 comments:

Unknown said...

Liburu hau oso interesgarria da, 14 urteko mutil bati gertatzen zaion istorioa kontatzen duelako eta gainera gure edadeko mutil bat delako. Istorioan zehar protagonistak eskola uztekotan egoten da baina bukaeran berriz eskolara bueltatzen da baina beste eskola batean asten da . Nire ustez liburu hau oso ondo irudikatzen du nola batzuetan gezurretan ibiltzen garen gurasoekin eta nolako liskarrak edukitzen ditugu gurasoekin ere bai. Liburua oso nahasia da amaiera aldea baina ulertzeko liburua dela esango nuke eta oso erraza irakurtzeko.Animo eta irakurri!!!!!!!!

Iñaki C./2013-2014 ikasturtea/3B

Anonymous said...

Niri liburu hau gustatu zait. Louis da protagonista eta Louisek eta bere gelakideek astebetez praktikak egin behar dituzte. Bere lagun Ludovikek praktikak berarekin irratian egiteko esaten dio. Baina azkenean Louisek bere amona joaten den ile- apaindegian egiten ditu praktikak Maite- maite ile- apaindegian. Bertan oso gustura ibiltzen da eta jende ugari ezagutzen du. Ile- apaindegiak gustatzen zaizkienei gomendatuko nieke.
Maria M (3.B)
2013- 14
Aralar BHI